Opinion.al ka publikuar videon e plotë të grabitjes së parave në aeroportin e Rinasit.
Nga pamjet e filmuara vihet re se grabitësit janë ndalur fillimisht pranë furgonit të sigurisë, por nuk arrijnë dot ta grabisin sepse ishte me dyer të mbyllura.
Më pas, ata kanë vrapuar menjëherë tek furgoni tjetër i sigurisë të cilin e gjejnë me dyer të hapura, nga i cili mendohet se janë vjedhur më pak se një milion euro.
Video e publikuar ka rreth dy minuta xhirime dhe tregojnë se në vendngjarje kanë qenë dy makina të konçesionarit të Rinasit, TIA.
Njëra nga makinat e ICTS ka levizur nga vendngjarja pa tentuar të ndalojë grabitësit, apo të lajmërojë policinë.
Ndërsa makina tjetër, e stafit të aeroportit, lajmëron për ngjarjen por nuk e ndjek makinën e grabitësve teksa ikën nga aeroporti.
Grabitja që ndodhi mesditën e 30 qershorit, mund të konsiderohet si një nga grabitjet më të mëdha dhe më spektakolare në vendin tonë.
Kjo jo vetëm për shumën e grabitur të parave, se sa për shkallën e paaftësisë së gjithë mekanizmit mbrojtës së perimetrit të sigurisë në aeroportin e Rinasit.
Është bërë me dije, se parat e grabitura, që po transportoheshin nga kompania e policisë private Nazeri 2000, po levizeshin për llogari të “Raiffesien Bank” me destinacion Vjenën.
Policia e Shtetit me anë të një deklarate ka bërë me dije se janë grabitur më pak se një milion euro.
Mësohet se grabitësit kanë hyrë me makinën e tyre nga një portë e jashtme e rrëthimit të aeroportit, e cila të nxirrte direkt në pistën e tij.
Edhe pse u tha se gjatë largimit të dy grabitësve ka pas të shtëna me armë nga stafi i aeroportit, video e publikuar, nuk dëshmon për një fakt të tillë.
Dy grabitësit, siç shihet edhe nga pamjet e filmuara, janë larguar krejt qetë nga vendi i ngjarjes.
Grabitja ndodhi vetëm një ditë pas shtimit të masave të sigurisë në aeroport, pas sulmeve terroriste në aeroportin e Stambollit.
