Pamjet e publikuara nga Opinion.al hedhin dritë mbi ngjarjen e 18 Shtatorit në Elbasan, ku makina e zv/drejtorit të Policisë së këtij qarku, Gjergji Oshafi u godit nga një Audi A8 e blinduar. Edhe pse policia është përpjekur të jetë diskrete për këtë ngjarje ku i sulmuar mbeti një zyrtar i saj, Opinion.al përmes këtyre pamjeve që transmetohen për herë të parë sjell ngjarjen ashtu siç ka ndodhur.
E gjithë skena zhvillohet përpara tregut agro-ushqimor në Elbasan, pronë e biznesmenit Petrit Çela. Siç shihet në pamje janë dy makina policie (njëra prej tyre e zv.drejtorit) që kontrollojnë një fuoristradë Range Rover, e drejtuar nga Kelmend Xhaferri dhe më pas kërkojnë shoqërimin në polici të mjetit.
Në momentin që nisen makinat e policisë për të çuar në komisariat makinën e dyshimtë, një mjet tjetër Audi A8 e blinduar vjen për të hyrë në tregun ushqimor. Siç shihet qartë në pamje, kjo makinë godet fort makinën e policisë. Prej aty del Gjergj Oshafi me pistoletë në dorë dhe efektivët e tjerë të policisë.
Audi A8 hyn me shpejtësi në tregun ushqimor. Pamjet tregojnë qartë se porta e hekurit të tregut është mbyllur brenda 23 sekondash nga roja i objektit, Valmir Dedja, tashmë i arrestuar.
Oshafi dhe efektivë të tjerë janë drejtuar për të hyrë në treg, por kur porta është mbyllur kanë ikur mbrapsht në dukje të frikësuar. Drejtuesi i Audit A8 që kreu sulmin dhe akuzohet për tentative vrasje ndaj zyrtarit të policisë ende nuk është arrestuar. Asnjë nga 12 efektivët e policisë që ndodhej në vendngjarje, jo vetëm nuk mundën ta ndalojnë, por as nuk e kanë identifikuar drejtuesin e Audit të blinduar që goditi makinën e zyrtarit të policisë.
Zv/drejtori i policisë, Altin Qato, i ftuar në emisionin “Opinion” duke komentuar këto pamje tha se policët qëlluan me armë në ajër në momentin që mjeti i tyre u godit nga makina e blinduar.
Qato konfirmoi gjithashtu se shkak i ndërhyrjes së policisë nuk ka qenë vetëm operacioni “Vjeshtë 2017”, por edhe një telefonatë e bërë në polici nga një person me emrin Sokol Ç i cili ka thënë: “Koli jam. Më ndihmo se në brendësi të tunelit më kanë dalë dy makina dhe më kanë bllokuar rrugën. Është një ‘Range Rover’ dhe një ‘Audi’ me ngjyrë të zezë. Jam i frikësuar”!
Kjo telefonatë është bërë në orën 16:20 dhe menjëherë i është përcjellë sallës operative dhe zv/drejtorit të Policisë. Burime nga organi i akuzës thanë dje, se nisur nga rrethanat e ngjarjes, shërbimet e Policisë janë vene në ndjekje të këtyre dy automjeteve dhe më pas incidenti ka ndodhur pranë Tregut Ushqimor.
Në dëshminë e tij dhënë për grupin hetimor, zv/drejtori Oshafi ka thënë: “Drejtuesi i mjetit, me sa vura re, ishte rreth 35-40 vjeç, me fytyrë të mbushur dhe me kapelë të rrumbullakët. Tjetër gjë s’kam mundur të fiksoj, pasi mjeti lëvizte me shpejtësi”.
Sakaq mbrëmjen e djeshme në zyrat e Opinion në Tv Klan kanë mbërritur oficerë të policisë gjyqësore dhe kanë sekuestruar pamjet që u transmetuan në emision.
/Opinion.al
