Një grup neurologësh me bazë në Itali, Portugali dhe Holandë kanë vënë në fokus Presidentin Rus Vladimir Putin për stilin e çuditshëm të ecjes.
Sipas tyre, krahu i tij i djathë nuk ka të njejtin ritëm lëvizjeje si i majti, por është më statik dhe kjo u interpretua fillimisht si shenjë e Parkinsonit. Por në fakt, rezulton se ecja e tij mund të ketë lidhje me trajnimet mbi armët, që Vladimir Putin ka bërë gjatë kohës sovjetike.
Studimi i publikuar në gazetën mjekësore britanike “The BMJ”, tregon se Putin ka një drejtepeshim të reduktuar. Në çdo ecje të tij vërehet një aktivitet i reduktuar në krahun e djathtë, i cili qëndron i ngurtë, krahasuar me krahun tjetër.
Ndonëse kjo ecje që njihet ndryshe si “Gunslinger Gait” mund të jetë shenjë e hershme e sëmundjes së Parkinson, për studiuesit, Putin nuk ka shfaqur shenja të sëmundjes.
Ata citojnë një manual trajnimi të KGB-së mbi bazë të të cilit gjejnë se stili i ecjes së Putin, është i lidhur me trajnimet që ka mbajtur në shërbimin sekret, ku para se të pensionohej, ishte ngritur në gradën e nënkolonelit.
Sipas manualit, operativët e KGB-së janë udhëzuar që armën e tyre ta mbajnë në anën e djathtë në afërsi të gjoksit dhe të lëvizin përpara me një anë, zakonisht nga e majta, për t’iu mundësuar atyre që kur të përballen me ndonjë armik, ta nxjerrin armën sa më shpejt që të munden.
