Gjatë mesditës së sotme, në media ka qarkulluar edhe një video e momentit kur avokati Ilia Ilia u dhunua përpara gjykatës së Durrësit.
Ngjarja ndodhi paraditen e së enjtes, ndërkohë që vetë Ilia ka akuzuar persona të lidhur me prokurorin Arjan Ndoj.
Një nga personat që e ka qëlluar Ilian është dhe Mand Voga, me banim në Fushë-Krujë, i cili pas kërkimit nga Policia rezulton që nuk gjendet në banesën e tij, ben me dije fax web.
Ne foto: Prokurori Ndoj dhe Mand Voga, autor i sulmit
Në media njëkohësisht kanë qarkulluar foto të prokurorit Ndoj me njërin nga autorët e dhunës, ndërsa vetë prokurori ka mohuar çdo lidhje me këtë akt.
Nga ana tjetër, vajza e Ilias për Faxweb.al, u shpreh se personat që e kanë rrahur avokatin, babanë e saj, janë shprehur qartë se e kanë bërë në emër të Prokurorit.
Sipas saj çdo gjë është e filmuar nga kamerat e sigurisë në Gjykatë, ku shihet se Ilian e qëllojnë me dorezë hekuri.
‘’Çdo gjë është filmuar nga kamerat aty dhe prokurori Ndoja vazhdon normalisht të qëndrojë në detyrë, ndërkohë që përpara se të goditej nga dy personat, një ditë më përpara është kërcënuar gjatë një debati në seancën gjyqësore që shumë shpejt avokati do bëhej pishman.
Dhe direkt pa kaluar 24 orë ndodhi goditja barbare dhe e pabesë. Ndërkohë që përpara se të dhunohej ata personat i kanë përmendur që ti je ai që ke debatuar me Ndojan.
Prandaj mos të thotë Ndoja që s’ka lidhje me ngjarjen sepse lidhja është e qartë sepse është një njeri i afërt i tij dhe një njeri që ka përmendur Ndojan para se ta godiste. Tre gjera nuk mund të jenë rastësi”, shprehet për Faxweb.al vajza e Ilias.
Ajo shprehet më tej se është e tronditur nga dhuna ndaj të atit të saj, pasi veprimi ka qenë barbar.
