Mediat britanike kanë publikuar pamjet e rënda të vrasjes së një shqiptari në Britaninë e Madhe. Sikurse shfaqet në video, i riu është përplasur qëllimisht me makinë dhe si pasojë mori plagë të shumta në kokë, të cilat i shkaktuan edhe vdekjen.
Ngjarja e rëndë ndodhi më 26 Dhjetor të vitit të kaluar në Coton Lane, Erdington. Familja e Z. Taka dha një deklaratë të shkurtër në atë kohë e cila thoshte: “Shkelzeni ishte një vëlla dhe partner dashur dhe familja e tij është shkatërruar për humbjen e tij.”
Shkëlzen Taka, 28 vjeç, kishte shkuar në një qendër masazhesh sëbashku me një shok tjetër po nga Shqipëria ku u përplas fillimisht verbalisht me një 27-vjeçar britanik. Por konflikti përfundoi me pasoja tragjike, me humbjen e jetës së 28-vjeçarit. Tony Green u arrestua pas ngjarjes dhe u akuzua si autor i vrasjes.
Autori i vrasjes
Green, po linte qendrën e masazheve kur ka parë Takën dhe mes tyre pati një konflikt të ashpër verbal.
Ndërkohë mediat britanike për herë të parë kanë publikuar edhe foton e autorit, i cili ka hipur në kofanon e makinës tip “BMW” të Takës dhe i ka shkatërruar xhamin e përparmë. Pastaj nisi të largohej, por gjithsesi u kthye edhe njëherë dhe përplasi parakolpin e mjetit të shqiptarit. Taka reagoi dhe e ndoqi 27-vjeçarin britanik me një send në dorë ku kërkonte t’i dëmtonte mjetin. Pas disa sekondash, Green ndaloi dhe filloi të lëvizte mbrapsht. Në këtë çast, Taka u ngjit në trotuar.
Makina “Skoda” e britanikut eci me shpejtësi dhe përplasi shtyllën e një shenje rrugore, e cila më pas ra mbi Takën duke i shkaktuar dëme të rënda në kokë. Green nuk ka ndaluar për asnjë moment derisa ka kaluar me makinë mbi Takën.
Më pas ai është larguar nga vendngjarja dhe po ditën e vrasjes dogji makinën.
Në seancën gjyqësore të zhvilluar ndaj tij, britaniku mohoi që të ketë prishur provat dhe tha se e kishte futur mjetin gabimisht në marshin mbrapsht. Ndërkohë, gjykata e shpalli 27-vjeçarin fajtor për vrasje./Opinion.al
