“Duam shkollën, duam shkollën”, thërrasin fëmijët e fshatit Mengel në Bashkinë e Elbasanit. Shkolla e tyre ishte një ndër të shumtat që u mbyll në vend këtë shtator.
Pranë këtij komuniteti ka qenë sot deputeti i PD për zonën, Luçiano Boçi.
“Prej një jave fëmijët janë në protestë bashkë me prindërit dhe kanë bojkotuar procesin mësimor, duke kërkuar rikthim në shkollën e tyre, e cila rezulton të jetë në gjendje të mirë për zhvillimin e mësimit. Një javë është goxha shumë, që Ministrja e cila fle mbi paaftësinë e saj lapidare, t’i jepte një përgjigje këtyre fëmijëve”, shkruan Boçi në facebook.
Sipas tij, ministrja është e papërgjegjegjshme dhe arrogante. “Në vend që të angazhojë prej tre muajsh stafin “bazhibozuk” për të bërë padira qesharake, ajo duhet t’i kishte dhënë zgjidhje situatës absurde me nxënësit e Mengëlit që dërgohen si “sardele” në Elbasan për të bërë mësim me turne. Megjithatë sot fëmijët i kanë dhënë flakurinën e parë të hidhur turinjve, kësaj papërgjegjshmërie e prepotence.Kanë hyrë vetë në shkollë duke hapur derën. Janë ulur në bangat e tyre e kanë kërkuar fillimin e mësimit”, thotë deputeti i PD-së.
