Është dashur ndërhyrja e policisë së rendit në gjykatën e Durrësit, për të shmangur thellimin e konfliktit midis dy familjeve, pas seancës së parë gjyqësore të divorcit midis dy të rinjve.
Konflikti është shënuar në orën 10 e 45 minuta, përpara gjykatës, midis burrave të dy familjeve veriore, ku secila prej tyre pretendon të mbajë e të rrisë fëmijën vetëm një vjeç.
Padia për divorc në gjykatë është bërë nga bashkëshortja Etleva Midha, e cila ka paditur bashkëshortin Roland Midha. Bashkëshorti, disa javë më parë pas ndarjes, i ka rrëmbyer nënës së re fëmijën gjatë kohës që ajo ka qenë duke ecur në rrugë. Kjo ka bërë që e reja t’i drejtohet gjykatës për divorc dhe për të mbajtur fëmijën një vjeçar, ndërsa edhe bashkëshorti në gjykatë ka pretenduar të rrisë fëmijën.
Pas seancës gjyqësore, burrat e dy familjeve janë grindur jashtë duke u shoqëruar në komisariat nga 2 patrulla policie.
Nëna ka këmbëngulur të marrë fëmijën për ta rritur, por është përballur me reagimin e ashpër të të atit, i cili nuk ia jep fëmijën nënës, pas ndarjes së tyre. Seanca gjyqësore drejtohet nga gjykatësja Dhurata Billo.
Dy të rinjtë ishin martuar rreth 2 vjet më parë dhe jetonin e punonin si emigrantë në Itali.
