Kjo është një torturë për qytetaren, por edhe për mjekët e familjarët që e mbajnë në krahë. Zyra Et’hemi është operuar në gju dy javë më parë në një spital privat. Mjekët dhe familjarët e zbresin dhe e ngjesin nëpër shkallë duke mbajtur barelën në krahë, sa herë ka nevojë për mjekim.
Rasti është denoncuar në Opinion.al, nga e bija e gruas që shihni në pamje. Ajo shpreh shqetësimin e madh të familjes së saj dhe të gjithë banorëve të pallatit për mungesën e ashensorit.
Pallati në pamje ndodhet tek “Unaza e Re” dhe është ndërtuar në vitin 2008 nga “Sahitaj Construksion” me pronar Abidin Sahitaj dhe Fatos Azermadhi. Prej 8 vitesh (2008-2016) kohë kur pallati është populluar, punimet kanë mbetur në mes. Banorja që denoncoi rastin e nënës së saj, tregon se “gropa e ashensorit është e hapur në mes të shkallëve, por kabina nuk është vendosur”.
Gjithashtu, ajo tregon se shumë punime të tjera si garazhi, oborri, punimet në shkallë janë të papërfunduara edhe pse të gjithë banorët jetojnë prej vitesh në këtë objekt 8+1 kate.
Përmes këtij denoncimi në Opinion.al, kërkon që të merren masa ndaj ndërtuesve që i kanë mashtruar prej 8 vitesh. Ndërsa shton se janë ankuar në njësinë administrative Kashar që ka dhënë lejen e ndërtimit, në Inspektoriatin Ndërtimor, etj., por asnjë masë nuk është marrë ndaj ndërtuesve./Opinion.al
*faksimile e kontratës së shtëpisë
