Pop-këngëtarja izraelite Netta Barzilai (25) po përballet me akuzat se kënga e saj ‘Toy’, me të cilën fitoi këtë vit në festivalin Eurosong në Portugali, është në fakt plagjiaturë.
Kompania amerikane “Universal Music Studios” ua ka dërguar një letër para padisë kompozitorëve të këngës fituese Doron Medalie (40) dhe Stav Beger (27). Ata pretendojnë se këta të fundit e kanë kopjuar këngën ‘Seven Nation Army’ nga viti 2003, të rok-bendit amerikan “The White Stripes”, shkruan ‘The Time of Israel’.
“Të gjitha këngët që konkurrojnë në Eurosong duhet të jenë origjinale. Nëse pretendimi për plagjiaturë rezulton i vërtetë, Izraeli do të shkualifikohet nga konkurrenca dhe Nettës do t’i mohohet fitorja. Si rezultat, Izraeli nuk do të ishte nikoqir i Eurosongut vitin e ardhshëm, njoftoi televizioni izraelit.
Avokatët e ‘Universal Music Studios’ pretendojnë se ekziston një ngjashmëri në ritëm dhe harmoni, dhe se me këtë po shkelen të drejtat e autorit. Një nga autorët e këngës Medalie udhëtoi në Shtetet e Bashkuara në përpjekje për ta zgjidhur situatën.
“Jam i befasuar që e kemi marrë këtë letër, por po e zgjidhim problemin. Besoj se do të dakordohemi me sukses gjatë javëve të ardhshme ashtu që të dyja palët të jenë të kënaqura”, tha ai.
Edhe nëse arrihet marrëveshja, Unioni Europian i Transmetimit (EBU) gjithsesi mund të thotë që “Toy” nuk është këngë origjinale, përcjell sot Koha Ditore.
Përndryshe, kritiku muzikor izraelit Ben Shalev, në mars të këtij viti shkroi se muzika nga kënga e Netta është shumë e ngjashme me hitin ‘Seven Nation Army’, dhe shpreson se tekstshkruesi i saj Jack White (42) do ta dëgjojë atë para Eurovisionit dhe do t’i padisë kompozitorët.
