Grabitja në aeroportin e Rinasit ka shkaktuar debate në Komisionin Parlamentar të Sigurisë. Lëvizja Socialiste për Integrim nëpërmjet deputetit Luan Rama, theksoi qëndrimin e saj se, qeveria duhet të kishte reaguar dhe duhet të kishte marrë përgjegjësitë për këtë krim të rëndë.
Ky qëndrim nuk është mbështetur nga socialistët Pirro Lutaj e Pjerin Dreu. Deputetet e opozitës bënë përgjegjëse Policinë e Shtetit se nuk ka kryer detyrën. Deputeti Flamur Noka e ilustroi qëndrimin e tij me një foto, duke thënë se ajo tregon që shefi i turnit për sigurinë në komisariatin e Rinasit, ishte në gjumë në kohen e grabitjes.
Opozita e quajti propagandë qeveritare deklaratën e policisë për shtimin e masave të sigurisë në Rinas pas ngjarjeve në Aeroportin e Stambollit.
