Ministri i Brendshëm, Sandër Lleshaj ka patur sot një debat të ashpër me Drejtorin e urbanistikës së Bashkisë Lezhë Nik Leka lidhur me një pallat që ka pësuar dëme nga tërmeti.
Teksa inspektonte situatën në Lezhë, Lleshaj është ndalur lagjen “Besëlidhja” ku pretendohet se një pallat 12 katësh është i rrezikshëm për banorët.
Ministri i ka thënë banorëve se pallati është i sigurt por Drejtori i urbanistikës i ka thënë ministrit në praninë e dhjetëra banorëve se pallati është konsideruar i rrezikshëm pasi ka çarje trarësh mbajtës dhe ka shtuar se duhet një ekspertizë më e specializuar.
Por Ministri e ka konsideruar këtë si një përhapje paniku dhe ka ngritur zërin duke i thënë disa herë ‘stop’.
Banorja: Nuk banohet në këtë pallat pa u bë ekspertiza.
Inxhinieri, Drejtori i urbanistikës: Ministër a mund të sqaroj diçka të lutem. Jam drejtori i urbanistikës. Kemi verifikuar këtë pallat bashkë me kryetarin. Në katin e tretë të banimit, në të katër anët, trarët mbajtës janë të çarë. Kemi sjellë një grup tjetër për ta verifikuar. Na duhet ekspertizë më e specializuar..
Lleshaj: Ti shefi i urbanistikës. Ti duhet të kesh shumë kujdes kur përhap panik.
Shefi i urbanistikës: Nuk i kam thënë unë këto fjalë.
Lleshaj: Kush i ka thënë?
Shefi i urbanistikës: Kryetari vetë.
Lleshaj: Po kryetari çfarë është?
Shefi i urbanistikës: Në gjykimin tonë ishte shumë e rrezikshme.
Lleshaj: Çfarë është kryetari? Përhapni kot me njerëzit. Kjo është xham i gjithi, nuk është thyer një xham bëni budallallëqe kot.
Shefi i urbanistikës: Situata nuk është e mirë aspak sepse e kemi verifikuar…
Lleshaj: Stop, stop! Në qoftë se i thua vetes inxhinier mendohu mirë kur flet! /Opinion.al
