Sot Real Madrid u rikthye në stërvitje pas finales së Botërorit të klubeve dhe pushimit të Krishtlindjeve. Në qendrën stërvitore të kampionëve të botës qenë pesë mijë tifozë, të cilët e kthyen seancën stërvitore në festë, kur në fushë u paraqit Cristiano Ronaldo. Së fundmi është raportuar se ylli portugez ka marrë një ofertë marramendëse nga Kina (300 milionë euro transferimi, mbi 100 milionë euro paga vjetore) dhe reagimi i mbështetësve të tij qe shumë natyral. “Cristiano nuk shitet! Cristiano nuk shitet!” – brohoritën ata.
Megjithatë, sot jo gjithçka shkoi mirë. Siç duket edhe në videon e këtij lajmi, sulmuesi 31-vjeçar nuk është mirë fizikisht dhe disa herë u tregoi shokëve të tij të skuadrës se ka një problem në kraharor. Ronaldo qe mjaft aktiv në ushtrimet e kryera dhe nuk i ndërpreu, por disa herë pështyu në tokë. Kjo i trembi tifozët, por ata shpejt i harruan këto episode, sepse 4-herë fituesi i “Topit të Artë” në fund shënoi një gol të bukur dhe festoi me gjestet e tij karakteristike, sikur të ishte në një finale të Ligës së Kampionëve.
