Saimir Tahiri ka qenë i ftuar në emisionin “Opinion” më 19 tetor ditën kur doli urdhër-arresti i prokurorisë për të. Urdhër-arrest që nuk u ekzekutua pasi Parlamenti nuk ia hoqi mandatin. I pyetur nga gazetari Blendi Fevziu, nëse ai disponon një skaf siç ka deklaruar PD dhe ish-polici Zagani, Tahiri e mohoi kategorikisht. Por sot faktet ndaj tij janë më kokëforte. Një 25 vjeçar i quajtur Orest Sota është kapur nga policia me plot 863 mijë euro dhe tre patenta, dy të Tahirit dhe një e bashkëshortes së tij.
Lloji i patentave
Është e konfirmuar nga policia se patentat në emër të ish-ministrit Tahiri janë origjinale. Pra, Tahiri kishte dy leje drejtimi për mjet lundrues “skipper” 12 vendësh me dy motora fuqie me 500 L, shpejtësi maksimale deri në 65 milje në orë dhe i gjatë 8 metra. Po kështu Tahiri zotëron një patentë tjetër për të drejtuar një mjet lundrues të tipit “skipper” deri në 100 NT. Ende nuk dihet se pse 25 vjeçari që mbahet për biznesmen, Orest Sota i kishte në makinën e tij dy patentat e Tahirit dhe një të gruas së tij, Fatlinda Berisha.
Çfarë tha në Opinion
Tashmë vlen për të kujtuar se çfarë ka thënë vetë Saimir Tahiri. “Ti mund të shkosh në kapiterinë e Durrësit dhe të shohësh a kam patur në pronësi skaf”, tha ai. Këmbënguljes së Fevziut: Pra nuk keni patur në pronësi skaf?- Ai u përgjigj “Asnjëherë!”.
/Opinion.al
