Gjykata e Tiranës ka bërë vlerësimin e masës së sigurisë për dy oficerët e policisë, arrestuar për pajisjen e përgjimit, Entiol Xhelilaj dhe Artion Duka.
Për ta është lënë në fuqi masa e arrestit shtëpiak me mbikqyrje elektronike, marrë nga po kjo Gjykatë në datën 7 Qershor.
Xhelilaj ka mbërritur i pari në gjykatë me një valixhe në dorë, ku mbante disa dokumenta, që do t’i përdorte për mbrojtjen. Në mënyrë ironike, ai ka nxjerrë nga kjo valixhe edhe një trëndafil, duke nënkuptuar se nuk ka përgjuar njeri.
Gjykatësi Arian Aliaj vendosi që seanca të jetë me dyer të mbyllura, sipas kërkesës së dy të arrestuarve.
Gjyqi ka zgjatur përtej parashikimeve, për shkak të debatit mes Prokurorit Gjergj Tako, avokatëve dhe dy oficerëve të policisë.
Përveç argumetave të berë të ditura më herët, Prokurori ka sqaruar se Duka dhe Xhelilaj nuk kanë qenë të pajisur me çertifikata sigurie, për të kryer përgjime.
I menjëhershëm ka qënë reagimi dy oficerëve, të cilët kanë mohuar akuzat, duke pretenduar se e vërteta do të zbardhet shumë shpejt. Avokatët mbrojtës të tyre, në fund të procesit thanë se do të apelojnë vendimin.
Ndërkohë, në Gjykatën e Apelit është caktuar data kur do të shqyrtohet kërkesa e Drejtorit të Policisë, Haki Çako, i cili u pezullua nga detyra nga Gjykata e Shkallës së Parë.
Në 16 Qershor, ai do dalë para togave të zeza, që do të vlerësojnë kërkesën e tij për rikthimin në detyrë.
