Në hyrje të qytetit të vogël të Rrëshenit, ku papunësia është ulur këmbëkryq, lulëzonte një biznes i madh, që pak kush e dinte dhe askush nuk e thoshte. Në ish-magazinat e grumbullimit, përpunohej dhe transportohej drogë me tonelata. Magazina ndodhet vetëm pak metra nga rruga kryesore e qytetit dhe vetëm 2 kilometra nga Rruga e Kombit që lidh gjitha qytetet e Shqipërisë me Kosovën.
Policia gjeti dhe sekuestroi plot 4.2 ton hashash, një pjesë i tharë dhe një pjesë tjetër në proces tharje. Kjo mendohet se është sasia më e madhe e kapur për këtë vit në një magazine te vetme. Ndërsa aksione të ngjashme me 1 apo 2 ton hashash janë kryer edhe në Vlorë, Burrel, Mamurras, etj.
Kush mund të bënte një biznes kaq të madh dhe të paligjshëm, krejt pranë rrugës kryesore. Një biznes ku levroheshin me miliona euro?
Tre ditë pas gjetjes së kësaj droge, ajo që dihet është se janë arrestuar 22 persona, ndërsa 9 gra që u gjetën në magazinë po hetohen në gjendje të lirë. Asgjë nuk thotë policia apo prokuroria për pronarin/pronarët e gjithë kësaj droge.
AbcNews ka mësuar përmes burimeve të saj, se Altin Ndoj dhe Viktor Simoni kishin marrë me qira magazinat tek pronari i tyre Kastriot Reçi. Ky i fundit, biznesmen i njohur në qytetin e vogël është shpallur në kërkim. Ende nuk dihet nëse kreu i këtij trafiku ishte Reçi apo Ndoj me Simonin që menaxhonin magazinën, apo ndonjë person tjetër i fshehur pas tyre?
Gjithashtu mbetet enigmatike mënyra se si ndërhyri policia e Lezhës dhe se si u transferuar më pas dy oficerë të policisë që thuhet se shkuan të parët në magazinën e kanabisit.
