Prej rreth tre muajsh, që kur në media u bë publik lajmi se një koronavirus i ri me origjinë nga Wuhan në Kinë po përhapet me shpejtësi duke infektuar dhjetëra mijëra njerëz dhe duke shkaktuar vdekjen e mijëra prej tyre, në cdo vend të botës po merren masa për të parandaluar kapërcimin e virusit nga një shtet në tjetrin, dhe për ta izoluar atë.
Ndërsa po punohet ende për zbulimin e një vaksine apo medikamenteve me të cilat mund të shërohet koronavirusi i ri, qytetarë në të gjithë botën kanë marrë masa për të reduktuar rrezikun e infektimit, duke blerë maska kirurgjikale, dizinfektues, vitamina e madje edhe rezerva ushqimore.
Shqipëria deri para pak javësh ishte listën e vendeve me rrezik të ulët për t’u prekur nga koronavirusi.
Por pas shpërthimit të saj në Itali e në shtetet rreth e rrotull, qytetarët kanë filluar të marrin masa parandaluese edhe në Shqipëri, ndërsa shtrohet pyetja nëse vendi ynë i ka kapacitetet e duhura për të identifikuar bartjen e virusit te personat e dyshuar, dhe për ta mbajtur atë nën kontroll.
Aparaturat ne ISHP
Mjekët dhe laborantët e Institutit të Shëndetit Publik tregojnë se në këtë institucion ka 3 aparatura PCR me të cilat kryhen testimet.
Virologia e specializuar për mikrobiologji molekulare, Iris Hatibi, pasi na pajis me veshjen mbrojtëse të nevojshme për të hyrë në laboratorin e analizave brenda ambienteve të Institutit të Shëndetit Publik, na drejton drejt dhomës ku ndodhen këto aparatura.
Virologia Iris Hatibi shpjegon edhe metodën me tre hapa të testimit të mostrave, nëse rezultojnë pozitiv ose negativ me koronavirus.
Virologia shpjegon se analizimi i mostrave kryhet nëpërmjet kompjuterit, duke ndjekur protokolle për identifikimin dhe analizimin e të dhënave.
Shefja e Departamentit të Infektivit në ISHP, Silva Bino tregon se këto aparatura bëjnë nornalisht rreth 100-200 analiza në ditë, por numri i tyre mund të shkojë deri në 1000 në ditë.
Në rast se kjo shifër tejkalohet, ajo tregon se Instituti ka edhe një aparaturë tjetër si masë përforcuese.
Përsa i përket panikut dhe frikës që lidhet me virusin dhe kapacitetin e Shqipërisë për ta përballuar, Hatibi thotë se ekzistenca së Institutit të Shëndetit Publik dhe këtij laboratori prej rreth 50 vjetësh, si dhe eksperienca dhe përgatitja e stafit, tregon se ka kapacitet per ta mbajtur këtë lloj diagnoze. / Elena Lika
https://www.youtube.com/watch?v=nnNT9d5SCx4&feature=emb_logo
