Kristian Prenga arriti një tjetër triumf të madh. Boksieri shqiptar po ngjit shkallët profesioniste të këtij sporti, dhe diçka të tillë e tregoi edhe ndaj kampionit të Kanadasë, Tim Shemeli. Sfida e zhvilluar në Toronto, nisi e zjarrtë, ku të dy boksierët shkëmbyen goditje.
Në mbyllje të raundit të parë, 27-vjeçari nga Mirdita i dha një goditje të fuqishme kundërshtarit, duke bërë diferencën. Raundi i dytë ishte vendimtar për fitoren e Prengës, ku pas reagimit të kanadezit, i dha një goditje “knock-out”-i. E majta e boksierit shqiptar rezultoi e papërballueshme për kundërshtarin e tij. Një fitore e ardhur nëpërmjet një paraqitjeje fantastike dhe nën entuziazmin e shumë tifozëve shqiptarë, të cilët ndodheshin në sallë.
Për djaloshin nga Mirdita, i cili zotëron dy tituj kampion Europe dhe një kampion bote në kickbox, kjo ishte fitorja e 8-të në boksin profesionist, ku 3 prej të cilave kanë ardhur me “knock-out” teknik. Një tjetër arritje për 27- vjeçarin, që po ngjit shumë shkallë në renditjen e përgjithshme, ku tashmë ndodhet i pozicionuar në vendin e 250 nga 1212 boksierë të rregjistruar në peshat e rënda.
