Fama e Conor McGregor sa vjen e rritet, sidomos në vendlindjen e tij, Irlandë, ku fansat e tij kanë nisur tashmë edhe ta imitojnë edhe në rrugë. Kështu ka ndodhur me dy të rinj, që ditën e premte në mbrëmje, po imitonin një duel të arteve marciale mikse në rrugët e Dublinit (Irlandë). Dy të rinjtë po luanin mes tyre, duke imituar McGregor e lëvizjet e tij, por çuditërisht në rrugë kalon pikërisht ikona e UFC-së, që po udhëtonte me një makinë.
McGregor ishte në sediljen e pasagjerit (nuk zbret nga makina) dhe pasi ka parë dy të rinjtë që po bënin sikur po duelonin ka ndalur makinën dhe i ka përshëndetur nga dritarja. Është më e pakta të thuash që dy të rinjtë nuk u kanë besuar syve kur kanë parë idhullin e tyre t’i përshëndeste nga makina dhe kanë rrokur duart me njëri-tjetrin. Dhe e gjithë skena e lojës së dy të rinjve është filmuar nga kalimtarë të rastit, që kanë parë edhe momentin kur McGregor i përshëndet të rinjtë e feston me ta.
