Ka qenë një situatë e pazakontë kjo e sotmja në urën e Drinit në Kukës. Trajlera të mëdhenj kanë bllokuar rrugën që lidh Shqipërinë me Kosovën për disa minuta duke shkaktuar edhe trafik. Siç shihet nga këto pamje, që ka siguruar Opinion.al, është dashur ndërhyrja me eskavator për të kaluar në urë materialet e prodhimit të energjisë me erë.
Këto që shihni në pamjet më poshtë janë fletë të mullinjve me erë, rreth 70 metra të gjatë.
Duket qartë se ura e ngushtë e Drinit, e pa rikonstruktuar ka krijuar vështirësi për trajlerat e kompanisë private që kryenin transportin. Siç shihet ka ndërhyrë kompania koncesionare e Rrugës së Kombit për lehtësimin e kalimit të automjeteve të tonazhit të rëndë.
Ashtu si është raportuar edhe më parë në mediat vendase është kompania turke, Guris Holding që po instalon turbinat me erë në Kosovë dhe pritet që në shtator në nisë prodhimi i energjisë prej 32 megavat (MW)./Opinion.al
