Kreu i Partisë Demokratike, Lulzim Basha nuk e di nëse Berisha do të jetë në listën e kandidatëve të PD-së në zgjedhjet e 2017-ës.
I pyetur nga gazetarja Ilva Tare, Basha tha se PD-ja do të hartojë një listë përfaqësuese, por nuk tha nëse Berisha do të përfshihej në listën e kandidatëve për zgjedhjet e ardhshme.
“Do të jetë një listë përfaqësuese dhe tani nuk është momenti për të diskutuar, por secili e kupton se çfarë do të thotë një listë përfaqësuese. Legjitimimi i këtyre listave do të bëhet në mënyrën më demokratike nga forumet e partisë dhe nga aleatët”, tha Basha.
Më pas gazetarja e ngacmoi duke i thënë: “Të ishit i sigurt do e thonit, apo jo?”. “Ta thuash në këtë mënyrë nuk është parimore dhe aspak për atë për të cilën qëndroj unë”, tha Basha, duke lënë të kuptohet se ai nuk e di nëse Berisha do të jetë në listë”.
Basha: Strazimiri më tha se nuk kishte armë zjarri me vete
Kreu i PD-së, Lulzim Basha tha në emisonin “Tonight” të Ilva Tares se deputeti Gent Strazimiri i kishte konfirmuar në Komisariat se nuk kishte armë zjarri me vete.
I pyetur nga gazetarja për foton e Strazimirit në protestën e Parkut ku ai shihet me armë në brez Basha tha se deputeti e ka mohuar këtë.
“Unë fola me Strazimirin në Komisariat dhe ai më tha se nuk kishte patur armë me vete”, tha Basha, në një kohë kur deputeti i PD-së u shoqërua në Komisariat dhe ndaj tij ka nisur procedimi penal për armëmbajtje pa leje.
Ai madje aludoi se fotoja mund të ishte e montuar, duke thënë se qeveria publikon çdo ditë foto të manipuluara me “photoshop”.
