Papunësia, arroganca e qeverisë dhe largimet nga puna ishin disa nga shqetësimet, që banorë të Klosit ndanë me kreun e opozitës, Lulzim Basha.
Arsyet e varfërisë kreu i opozitës tha se i gjen tek keqeverisja e Edi Ramës, të cilin e akuzoi se për vjedhje të parave publike dhe mos mbajtjen e premtimeve.
“Kanë vjedhur 1.2 miliardë dollarë me të cilat për 6 vjet qytetarët do ta kishin energjinë falas. Edi Rama rri dy orë në ditë në televizor ndërkohë që produktin e ka zero, zero për punësimin, zero për shëndetësinë falas, zero për legalizimin etj, etj. 1.2 miliardë dollarë të zhdukura në një vit të vetëm. 1 miliardë e 200 milionë janë baras me 900 shkolla të reja të ndërtuara nga fillimi. 1 miliardë e 200 milionë janë baras me 6 vjet fatura nacionale e energjisë elektrike e mbledhur së bashku e të gjithë shqiptarëve. Pra, është njësoj sikur shqiptarët 6 vjet të mos paguanin energjinë por ta kishin falas nga shteti.”
Në Klos, kreu i opozitës u takua edhe me të rinjtë e Forumit Rinor të Partisë Demokratike.
Pasi dëgjoi shqetësimet e tyre për tarifat e larta të shkollimit, Basha premtoi se pas ardhjes në pushtet do të shfuqizojë ligjin për Arsimin e Lartë dhe premtoi uljen e tarifave studentore.
Tv Klan
