Policia e Shkodrës ka vënë në pranga autorët e grabitjes së disa ditëve më parë të një argjendarie në lagjen ‘Vasil Shanto’ në Shkodër.
Përmes një njoftimi për mediat, policia bën me dije se janë arrestuar dy persona të dyshuar si autorë të grabitjes, respektivisht Françesko Vukaj, 23 vjeç, banues në fshatin Rrenc, si dhe bashkëpunëtori i tij Iraldo Filipi, 28 vjeç, banues në fshatin Gajtan.
Vukaj u ndalua pasi dyshohet si autor i grabitjes me datë 3 shkurt, ku me mjetin tip Volkswagen pa targa, ka goditur qepenin e një argjendarie në lagjen “Vasil Shanto”, ka marrë disa sende floriri brenda, dhe më pas është larguar duke braktisur mjetin.
Ndërsa shtetasi Iraldo Filipi u arrestua, pasi në anën tjetër të rrugës ka qenë duke pritur me mjetin tip Benz, për t’u larguar së bashku me shtetasin Françesko Vukaj nga vendngjarja, pas grabitjes së argjendarisë.
Policia ka sekuestruar në cilësinë e provës materiale mjetin tip Benz me targa AA 294 GU, i cili është përdorur nga autorët për largimin nga vendngjarja, si dhe një orë dore floriri e cila rezulton e vjedhur në argjendari.
