Ambasadorja Yuri Kim ka uruar të gjithë shqiptarët për Vitin e Ri 2023 nëpërmjet një video mesazhi të publikuar në faqen zyrtare të ambasadës amerikane.
Kim teksa thotë që 2022 ka qenë një vit sfidash, vlerëson bashkëpunimin me SHBA.
“Ka qenë një vit sfidash dhe mundësish të jashtëzakonshme dhe mendoj se kemi bërë shumë përparim, shqiptarë dhe amerikanë së bashku, në çështjet e demokracisë, mbrojtjes dhe biznesit. Është gjithashtu mënyra e duhur për të festuar 100 vjet marrëdhënie mes dy vendeve tona dhe popujve tanë”.
Teksa bën një bilanc rezultatesh, Kim ndalet te reforma në drejtësi, për të cilën thotë se nuk ka qenë e lehtë apo e përsosur, por po vazhdon të ecë përpara.
“Viti 2022 pati gjithashtu rezultate të rëndësishme në luftën kundër korrupsionit, krimit të organizuar dhe pandëshkueshmërisë. Reforma në drejtësi nuk ka qenë e lehtë, e shpejtë apo e përsosur, por ajo vazhdon të ecë përpara”.
Më tej Kim thotë së janë forcuar lidhjet mes popullish shqiptar dhe amerikan përmes vlefshmërisë së vizave. “Ne forcuam lidhjet mes popullit shqiptar dhe amerikan. Vlefshmëria e re dhjetë vjeçare e vizave për shqiptarët e kualifikuar do të na mundësojnë të zgjerojmë mundësinë e ndërsjellta për turizëm, biznes, arsim dhe miqësi”.
Një falenderim Kim pati për Shqipërinë për mikpritjen ndaj afganëve.
