Një video e re që tregon një përplasje fizike mes Alex Prettit dhe agjentëve federalë është publikuar, më shumë se një javë përpara se ai të qëllohej për vdekje nga agjentë të Doganave dhe Mbrojtjes Kufitare.
Një përfaqësues i familjes së Prettit konfirmoi për CNN se burri në videon e postuar të mërkurën është Pretti.
Në videon e publikuar nga The News Movement, Pretti shihet duke u bërtitur agjentëve dhe duke goditur me shkelm dritën e pasme të automjetit të tyre, ndërsa agjentët po largoheshin me makinë. Agjentët ndalojnë, dalin nga automjeti dhe e rrëzojnë Prettin përtokë. Përleshja në Minneapolis zgjat vetëm disa sekonda, përpara se Pretti të ngrihet. Një armë duket se është e futur në brez, por nuk është e qartë nëse agjentët e kanë vënë re. Agjentët nuk ia marrin armën Prettit; përkundrazi, ata largohen. Nuk është e qartë se çfarë ndodhi menjëherë para ose pas pamjeve filmike.
Departamenti i Sigurisë Kombëtare tha se po i shqyrton pamjet.
The News Movement e nxori videon pasi shqyrtoi pamje të protestuesve dhe agjentëve federalë të xhiruara në qytet 11 ditë përpara se Pretti të qëllohej dhe të vritej. Pamjet u filmuan më pak se 2 milje nga vendi i përballjes vdekjeprurëse të Prettit me agjentët federalë.
Në video, Pretti mban një kapelë kafe, xhaketë kafe, bluzë të çelët me kapuç dhe pantallona bezhë, të ngjashme me veshjen që kishte ditën kur u qëllua për vdekje.
Një tjetër video tregon një kënd tjetër të përleshjes mes Pretti-t dhe agjentëve federalë, të cilët shihen duke dalë nga një automjet dhe duke u përballur me 37-vjeçarin përpara se ta rrëzojnë përtokë para dëshmitarëve që bërtasin. Ndërsa në sfond dëgjohen boritë e makinave, Pretti përfundimisht arrin të çlirohet, dhe agjentët shihen duke përdorur një lloj pajisjeje tymuese përpara se të largohen me makinë. Më pas dëgjohet një kalimtar që e pyet Prettin se si është, dhe ai përgjigjet “OK”.
“Një javë përpara se Alex të qëllohej në rrugë, pavarësisht se nuk përbënte kërcënim për askënd ai u sulmua dhunshëm nga një grup agjentësh të ICE-it,” tha Steve Schleicher, avokati i familjes Pretti. “Asgjë nga ajo që ndodhi një javë më parë nuk mund ta justifikonte vrasjen e Alex nga ICE më 24 janar.”
CNN kishte raportuar më herët se Pretti, një infermier i kujdesit intensiv 37-vjeçar, kishte pasur një përballje me agjentët rreth një javë përpara vdekjes së tij dhe ishte i njohur për autoritetet federale. Sipas burimeve të CNN-it, atij iu thye një brinjë kur një grup oficerësh federalë e rrëzuan përtokë ndërsa ai po protestonte kundër përpjekjes së tyre për të ndaluar persona të tjerë. Nuk është e qartë nëse kjo përballje është ajo e filmuar nga The Neës Movement. DHS tha në një deklaratë të martën se “forcat e rendit të DHS-it nuk kanë asnjë regjistrim për këtë incident”.
Një burrë nga Minneapolis i tha një media lokale se kishte parë një protestues duke goditur dritën e pasme të një automjeti të ICE-it dhe duke u rrëzuar përtokë nga agjentët më 13 janar, ndërsa vëzhguesit e ICE-it dhe protestuesit përplaseshin me agjentët federalë.
“Ishte një shkelm vërtet i fortë,” tha burri, Andy Larson, për Sahan Journal.
Pamje e shpërndara online nga Larson tregojnë një kënd tjetër të përballjes, me Prettin tashmë të shtrirë përtokë nga agjentët. Ai shihet duke u ngritur me vështirësi dhe duke folur me ta përpara se një bombol gazi lotsjellës të shkojë drejt grupit më të madh të protestuesve.
