Kënga përshëndetëse e Top Channel në fund të vitit, përtej të gjitha detajve që zbuloi për disa nga personazhet e njohur të ekranit, bëri publik edhe një detaj që shumëkujt nuk i shpëtoi… përveҫ burrave. Bieta Sulo, partnerja e Alban Dududhit është në pritje të ëmbël dhe këtë lajm të bukur e sinjalizoi për publikun pikërisht në këngën përshëndetëse të Top-it, “It’s the most wonderful time of the year”, kur në pemën e festës vendosi edhe një palë papuҫe bojëqielli.
I ftuar këtë javë në programin “M’fal për shprehjen”, me Elvis Pupën, Albani rrëfeu se këtë detaj as ai nuk e kishte vënë re. Pasi Visi i rrëfeu se bashkëshortja e tij e kishte pyetur dhe pastaj konfirmuar shtatzëninë e Bietës pikërisht nga shenja e papuҫeve, Albani pranoi se “burrat nuk marrin vesh fare…”: “Për Zotin, edhe unë, me thënë të drejtën, nuk e kisha vënë re këtë detaj. Vetëm kur mora vesh të nesërmen nga gazetat që ishte shtatzënë Bieta…. Ne burrat nuk marrim vesh fare… “ – tha Albani duke vijuar lojën e Visit se “burrat, vërtet nuk marrin vesh fare…”
Një ditë pas këngës dhe klipit, Bieta dhe Albani postuan në profilet e tyre nga një foto përshëndetëse duke e ndarë me të gjithë lajmin e bukur se së shpejti ata do të bëhen prindër të një djali.
