Procesi i vettingut ka shkarkuar një tjetër kryetar gjykate ditën sotme.
Kryetari i Gjykatës së Rrethit Gjyqsor Fier, Roland Jaupaj, është shkarkuar nga detyra nga Komisioni i Pavarur i Kualifikimit pasi janë konstatuar një sërë parregullsish në formularin e vetë deklarimit të pasurisë.
Treshja gjykuese e KPK-së përbëhej nga Genta Tafa(Bungo) kryesuese, Pamela Qirko relatore dhe Etleda Çiftja anëtare. Në cilësinë e vëzhguesit ndërkombëtar ishte e pranishme Maria Tuma.
Jaupajt ju identifikua një konflikt i mundshëm interesi në blerjen e një apartamenti nga prindërit e tij dhe paqartësi në përfitimin e 13 mij eurove nga bashkëshortja në ndërmjetësimin për blerjen e një shtëpie.
Sipas relatores Pamela Qirko, Roland Jaupaj ka shqyrtuar çështjen gjyqësore me palë Bashkinë e Fierit dhe Shoqërinë ndërtuese M.Sh.P.K., cila ka ndërtuar pallatin ku gjendet edhe apartamenti me sipërfaqe 170 m2 dhe garazhi 22 m2, të blera prej babait të tij.
Komisioni evidentoi faktin se Gjykata e Fierit ka rrëzuar kërkesë- padinë e bashkisë që kërkonte pezullimin e lejes së ndërtimit, duke i dhënë të drejtë kompanisë M. Sh.P.K. e cila ka ndërtuar pallatin ku gjendet edhe apartamenti ku jeton gjyqtari Jaupaj.
Komisioni konstatoi gjithashtu si problem faktin se bashkëshortja e Jaupajt ka deklaruar përfitimin e 13 mijë eurove nga ndërmjetësimi në blerjen e një apartamenti dhe 1 milionë lekë dhuratë nga tezja dhe bashkëshorti i kësaj të fundit për shkollimin.
Komisioni vëren se nuk qëndron deklarimi i bashkëshortes së gjyqtarit Jaupaj për blerjen e këtij apartamenti, pasi nuk ka dokumente për kalimin e kësaj pasurie nga ajo tek tezja.
Gjatë dhënies së vendimit Roland Jaupaj nuk ishte prezent në sallë. /Opinion.al
