Teksa opozita proteston jashtë, në Parlament janë zhvilluar diskutime sipas rendit të ditës. Deputeti demokrat Myslim Murrizi, i cili nuk pranoi të dorëzonte mandatin, ka thënë se për të luftuar drogën duhet vullnet politik. Murrizi ka hedhur dyshime mbi emërimet dhe shkarkimet në polici, duke shtuar se mbështet çdo ligj që ndihmon policinë.
“Nuk besoj që PD-ja ka luftë me 13 mijë policët. Vettingu ka ardhur në nevojë për faktin e pamohueshëm që ju në shtator të 2013 deri në janar 2014 rikthyet 248 ish-oficerë të liruar nga qeveria e PS 1997-2005 nga grada të ulëta deri te Artan Didi që u bë drejtor. Askush nga këta 36 të rikthyer nuk është më në radhët e policisë. Nga Artan Didi, Neritan Nallbati, Fatmir Lleshi etj, nuk janë më në policinë e shtetit. Këta që merrnin përqindje nga hashashi duhet të hetoheshin. Dy ministra tuaj janë të shkarkuar. 128 emrat thoshte SHIK-u janë të implikuar në trafikun e kanabisit. Duhet vullnet politik për të luftuar drogën dhe trafikun. Hiqni 128 që i keni në tavolinë dhe ato që iu morët nga komisionerë të PS dhe i prutë në polici. Unë mbështes çdo lloj ligji që i vjen në ndihmë policisë. Drejtor i SHÇKB-së ishte për katër vite Arben Skëndo, e hoqët e çuat në Korçë, atje u kap autobusi me drogë, dhe sot nuk dihet ku është dërguar. Policia nuk duhet të ketë njerëz që i vërtit ‘babale compani’”, tha Murrizi.
Ndërkohë, Ministri i Brendshëm Sandër Lleshaj ka thënë se procesi i vettingut në polici vështirë se mund të mbyllet brenda muajit mars të vitit të ardhshëm. Lleshaj propozoi edhe disa ndryshime, duke thënë që punonjësit e SHÇBA-së ta kryejnë të parët këtë proces.
“Duke u ndalur te vettingu ne polici. Është e vështirë që procesi të mbyllet në mars të vitit të ardhshëm prandaj kërkojmë disa ndërhyrje. Punonjësit e SHÇBA-së të kalojnë vettingun në fazën e parë me qëllim që të shëndrrohet në aktorin kryesor të procesit për më tej sikur e parashikon ligji organik i saj. Vlerësimi i fazës së parë do të kryhet nga një komision i jashtëm për të hapur dosjet e drejtuesve të lartë. Në fazë ne dytë dhe të tretë për punonjësit e policisë së shtetit vettingun ta bëjë SHÇBA, jo struktura ad hoc. SHCBA-ja do të ketë bazën e të dhënave dhe kështu do të shkurtojë një hallkë. Procesi garanton siguri dhe thelbi mbetet i paprekur. Kriteret mbeten të njëjta”, ka thënë Sandër Lleshaj./Opinion.al
