Rreth orës 11.30 para Komisionit të Pavarur të Kualifikimit doli për një seancë dëgjimore Dritan Prençi, prokuror në Prokurorinë pranë Gjykatës së Shkallës së Parë për Krimet e Rënda Tiranë.
Trupa Gjykuese e përbërë nga Genta Tafa (Bungo), Pamela Qirko dhe Suela Zhegu, bëri publik raportin i Inspektoratit të Lartë të Drejtësisë Kontrollit të Pasurive dhe konfliktit të interesi, sipas të cilit Prençi ka bërë deklarim të saktë dhe se ka burime financiare të ligjshme.
Pasuria e prokurorit të Krimeve të Rënda rezulton të jetë: një apartament 74 metra katrorë i blerë me kredi, një autoveturë tip “Golf” me vlerë 2 mijë euro, si dhe 1/8 e tokës së pandarë të babait të tij 3 mijë metra katrorë në Reç të Dibrës. Edhe raporti i Drejtorisë së Sigurimit të Informacionit të Klasifikuar pohon se ai i përshtatshëm për vazhdimin e detyrës.
Trupa gjyqësore e Vettingut në KPK, bëri të ditur gjatë seancës dëgjimore se ka pasur dy kallëzime ndaj prokurorit Dritan Prençi, por në të dy rastet është vendosur “mosfillim procedimi penal”. KPK ka vlerësuar se nuk ka indicie që mund të ngrëne dyshime mbi kallëzimet.
