Detaje të reja janë zbardhur nga ngjarja e rëndë e ndodhur pak ditë më parë në Durrës, ku 41-vjeçarja Bedrie Loka i dha fund jetës duke konsumuar fotoksinë.
Policia ka arrestuar si të dyshuarin kryesor që çoi në vetëflijimin e 41-vjeçares, bashkëshortin e saj, Xhemal Loka.
Ndërkaq, gazetarja Klodiana Lala ka zbuluar dinamikën e arrestimit të bashkëshortit të tij, dhe dyshimet sesi ai po tentonte që të arratisej nga Shqipëria pas ngjarjes.
Në dosjen hetimore thuhet se në banesën e Xhemal Lokës, në anën jugorë të banesës, në kotecin e pulave është gjetur e mbështjellë me peshqir një armë zjarri automatik “PPS”, me krehër pa fishek, pjesët e lëvizshme të rregullta e me gjilpërë të rregullt, me numër arme “89-0579”.
Po ashtu në të njëjtin vend janë gjetur 114 copë fishekë, model ’54, kalibër 7.62mm dhe 4 katër fishekë model ’56, kalibër 7.62mm”, të cilat do t’i nënshtrohen ekzaminimeve balistike.
Mësohet gjithashtu se teksa Xhemal Loka ishte shoqëruar tashmë në Komisariatin e Policisë Durrës, i janë gjetur me vete një sasi parash prej 2’800 Euro dhe 27’000 Lekë.
Sipas grupit hetimor, marrë shkas nga konteksti i ngjarjes, dyshohet se Loka me këto para do të arratisej jashtë shtetit, për t’ju fshehur procesit hetimor.
