Pas shkarkimit të drejtorëve në Bashkinë Vlorë, kryeministri Rama ka paralajmëruar se do bëjë të njëjtën gjë në Bashkinë e Fierit dhe të Durrësit.
Në një komunikim “live” në rrjete sociale, Rama theksoi se kjo është një domosdoshmëri pas një periudhe të gjatë qëndrimi në të njëjtat pozicione të të njëjtëve njerëz.
“Sot pasdite jemi në Fier dhe pastaj në Durrës, ku do të vazhdojmë të njëjtën përpjekje. Një vetëpastrim dhe vetëqetësim i brendshëm i strukturës.
Domosdoshmëri pas një periudhe të gjatë qëndrimi në të njëjtat pozicione të të njëjtëve njerëz, por edhe si rrjedhojë e domosdoshmërisë për ta parë realitetin e qyteteve tona të mëdha një realitet në transformim të vazhdueshëm.
Duhen sy të freskët, duhet një përpjekje shtuar, një hov i ri, sepse 12 mandate në Fier, janë histori, e shkruar nga dhjetëra mijëra mbështes tanë në zonë, diasporë, që kërkon të vazhdojë të shkruhet si një kapitull i ri, që kanë nevojë për më shumë cilësi jete”, tha Rama.
Rama u shpreh se prona është një element bashkëjetese, e jo dhune.
“Janë ata mbështetës që bëjnë biznes, kanës njesitë e shërbimeve, e duam patjetër që ata të vazhdojnë të bëjnë sukses, të bëjnë fitim, por jo duke zaptuar territore, jo duke u zgjeruar përtej atij kufiri ndarës të logjikshëm që e bën trotuarin një hapësirë bashkëjetese. E jo një hapësirë për të pushtuar, që e bën bllokun e banimit dhe hapësira mes pallatëve një hapësirë bashkëjetese, e jo një hapësirë për të diktuar dhe për t’u imponuar të tjerëve, e për të vendosur trarë, duke marrë lekët ilegalisht për parkime… që e bën pronën një komponent të bashkëjetesës, e jo një element të dhunës”, tha Rama.
