Xhaketa e personalizuar, e zhvilluar nga kompania ndërtuese në bashkëpunim me një prodhues materialesh ndërtimi, përdor efektin termoelektrik për të rritur efektin ftohës dhe është shpërndarë për 1 mijë e 500 punëtorë.
“Ndihem krejtësisht ndryshe. Kur e vesh këtë jelek, nuk djersitem aq shumë, kështu që nuk e humbas forcën fizike, dhe temperatura e trupit tim është krejtësisht e ndryshme kur kthehem në shtëpi”, tha një punëtor ndërtimi.
Kjo xhaketë, është një nga zgjidhjet të mira deri më tani për të ndihmuar punëtorët të përballojnë vapën përvëluese, ndërsa temperaturat arrijnë nivelet më të larta në kryeqytetin japonez, dhe kushtet e nxehta e bëjnë punën jashtë tepër të rrezikshme për goditje nga dielli.
“Në të kaluarën, nuk vishnim xhaketa me ajër të kondicionuar apo diçka të tillë dhe nuk kishte aq shumë raste të njerëzve që rrëzoheshin për shkak të goditjes nga nxehtësia sa ka tani. Vitet e fundit, xhaketat me ajër të kondicionuar janë bërë një domosdoshmëri, gjë që më bën të kuptoj se sa vapë bën”, tha punëtori.
Alarmet për të nxehtë ekstrem janë lëshuar në 30 nga 47 prefekturat në mbarë vendin, më shumë se çdo herë tjetër këtë sezon, si pasojë e një vale të zgjatur të të nxehtit që ka përfshirë pjesën më të madhe të vendit, pas qershorit më të nxehtë të regjistruar ndonjëherë në Japoni.
Nxehtësia ekstreme, e cila tashmë është bërë normë gjatë verës në Japoni, është kthyer në një rrezik serioz për vendet e punës, ndaj qeveria ka miratuar që nga qershori rregulla të reja për sigurinë në punë, që u kërkojnë kompanive të zbatojnë masa mbrojtëse.
“Ne kemi instaluar një kamerë live të lidhur me një matës moti në pjesën e sipërme të ndërtesës. Kjo pajisje na lejon të monitorojmë indeksin e nxehtësisë në kohë reale. Nëse indeksi i nxehtësisë tejkalon 28, ne do t’u këshillonim të gjithë punëtorëve të bëjnë një pushim të paktën një herë në orë, dhe nëse tejkalon 31, të pushojnë të paktën një herë në 30 minuta”, tha menaxheri i ‘Daito Trust’.
Punëtorët e ndërtimit janë veçanërisht të rrezikuar, pasi në vitin 2023 ata përbënin gati 20% të rasteve të vdekjeve apo sëmundjeve në vendin e punës për shkak të goditjes nga nxehtësia, sipas të dhënave të ministrisë së punës. Numri total i rasteve të tilla në vendin e punës është më shumë se dyfishuar krahasuar me një dekadë më parë.
Klan News
