Nënë Tereza do të shpallet “shenjtore” më 4 Shtator, në një ceremoni që do të zhvillohet në Vatikan. Dekreti u firmos, mëngjesin e së martës nga Papa Françesku, gjatë mbledhjes së Këshillit të Tretë Publik.
Më 17 Dhjetor të vitit 2015, Ati i Shenjtë pranoi edhe mrekullinë e dytë pas vdekjes të murgeshës së famshme shqiptare, e cila ia dedikoi jetën e saj të varfërve në Kalkuta të Indisë.
Mrekullia e re që i njihet Nënë Terezës, e cila ndërroi jetë në vitin 1997 është ajo e shërimit të një braziliani, i sëmurë me tumor në kokë, i cili u shërua plotësisht në vitin 2008, falë besimit dhe lutjeve tek Nënë Tereza.
Gonxhe Bojaxhi u vlerësua me çmimin Nobel për Paqën në vitin 1979, për punën e saj dedikuar të varfërve, të sëmurëve dhe të moshuarve në Kalkuta.
Themeluesja e “Misionarëve të Dashurisë” u lumturua nga Papa Gjon Pali i Dytë në vitin 2003 pas njohjes së mrekullisë së parë pas vdekjes: shërimit të një gruaje nga Bengali.
Sakaq sot në Tiranë u vendos pranë piramidës, në krah të Kryeministrisë busti i Papa Franceskut. Në aktivitetin e zhvilluar nga bashkia, mori pjesë edhe Presidenti Nishani.
