Brenda dhjetorit pensionistët do të marrin 3 mijë lekë shpërblim për festat e fundvitit. Qeveria ka konfirmuar zyrtarisht vazhdimin e paketës së solidaritetit, një term i përmendur nga Rama një vit më parë.
Ndryshe nga dhjetori 2016, kur shpërblimi ishte 6 mijë lekë, këtë vit qeveria do të ndajë nga 3 mijë lekë për 650 mijë pensionistët. Por lajmin e mirë e dha dje ministri i Financave.
Në përgjigje të amendamenteve të PD, Ahmetaj theksoi se programi i qeverisë parashikon që në vitet e tjera shpërblimi apo paketa e solidaritetit në fundvit të jetë 7 mijë lekë për çdo pensionist. Kjo shifër do të vijë në rritje nga viti në vit.
“Nëse do të flasim për paketa solidariteti, ne jemi realisht kampion në mbështetje të paketës së solidaritetit për shtresat në nevojë. Vitin e kaluar dhamë 6 mijë lekë për çdo pensionist. Dhe ndërkohë mos harroni që jemi duke ulur borxhin. Sërish do të japim prapë, edhe këtë vit. Dhe e kemi futur në vitet që vijnë në programin e qeverisë që do të marrin minimalisht 7 mijë lekë. Pra, shpërblimi do të vijë duke u rritur. Nëse donit të mendonit për pensionistët, duhet të votonit për amendamentin që bëri maxhoranca, për taksën e ndërtesës.
Të ishit çuar dhe të kishit votuar pro heqjes së taksës për pensionistët. Atë kartonin e kuq ta kishit bërë jeshil dhe në respektin tuaj ndoshta do ta kisha mbështetur amendamentin tuaj”, tha Ahmetaj.
Partia Demokratike propozoi përmes deputetit Bardh Spahia një amendament, përmes të cilit i kërkonte qeverisë që t’u jepte për shpërblim pensionistëve në fundvit masën e gjysmës së vlerës së pensionit mujor. Ky propozim i PD u rrëzua me 72 vota, ndërkohë që nisma mori vetëm 42 vota pro. Deputetja e PD, Jorida Tabaku, i kërkoi qeverisë të mos japë shpërblime për pensionistët vetëm në vite elektorale. “Ne, kur e bëmë këtë propozim, kishim parasysh edhe propozimet që ju bëtë vjet. Pse në vit elektoral ju jepni shpërblim për pensionistët
dhe në çdo vit tjetër u shtrëngoni buxhetin. Unë dëgjova shqetësimin e z. Majko që thoshte se qeveria e ka katandisur shpërblimin në një kofshë gjeli”, tha deputetja e PD.
Por qeveria rrëzoi edhe propozimin e Tabakut për shtimin e fondit për ishtë përndjekurit politikë.
Propozimi i PD ishte të rritej me 2.5 miliardë lekë buxheti për shtresën e ish-të përndjekurve për vitin 2018. Ministri i Financave, Arben Ahmetaj, theksoi se brenda këtij viti, të gjithë ish-të përndjekurit që janë gjallë do të shlyen përfundimisht, ndërkohë që do të rishihet shpërblimi për familjarët dhe përfituesit indirektë nga pagesat e ish-të përndjekurve.
“Fondi i akorduar deri në 2013 nuk e kap as 60% të fondit të akorduar që nga 2013 deri në 2018. Sa për dijeni, me aktin normativ të fundit shlyet kësti i 8-të plotësisht, me gjithë ata që kishit përjashtuar. Vitin tjetër shlyen në janar dhe shkurt ata që ju nuk i pranuat kurrë. Këtu në Kuvend do të vendosin bashkë se çfarë do të bëjmë me ata që janë kushërinj, trashëgimtarë apo janë përfitues indirektë të vuajtjes.
Përfitues indirektë nuk ka. Të gjallët mbarojnë të gjithë së shpërblyeri dhe së marri atë që u takon brenda këtij viti”, sqaroi Ahmetaj. / Panorama.al
