Vendimi i presidentit amerikan Donald Trump për të njohur Jeruzalemin si kryeqytet të Izraelit dhe për të zhvendosur aty përfaqësinë diplomatike të Uashingtonit, ka sjellë pasojat. Dhuna ka shpërthyer si në Jeruzalem dhe kudo në territoret palestineze.
Me dhjetëra janë të plagosurit nga radhët e protestuesve palestinezë, gjatë përleshjeve të dhunshme me forcat izraelite të sigurisë, në Jeruzalemin Lindor të populluar nga myslimanët, por edhe në qytete të tjera të Bregut Perëndimor.
Protesta përpara përfaqësive diplomatike të Shteteve të Bashkuara ka pasur në shumë qytete të mëdha të botës islame. Me mijëra njerëz protestuan para Konsullatës Amerikane në Stamboll. Në Egjipt iu vu flaka flamujve amerikanë e izraelitë.
Manifestime ka pasur deri në Indi, Pakistan e Malajzi. Vendimi i Trump-it kundërshtohet edhe nga aleatët perëndimorë të Shteteve të Bashkuara. Britania e Madhe, Franca e Italia janë mes vendeve që kërkuan mbledhjen e Këshillit të Sigurimit të OKB-së të premten për të diskutuar pasojat e këtij vendimi./Tv Klan
