Zëvendës trajnieri i Shqipërisë, Paolo Tramezzani me shumë mundësi mund të largohet nga Kombëtarja Shqiptare e Futbollit.
Ky lajm prej kohësh po qarkullonte në formën e një thashethemi, por tashmë duket se do të bëhet realitet. Tramezzani flitet të shkojë si trajnier i Luganos për sezonin e ardhshëm.
Ai është vlerësuar shpesh nga Gianni De Biassi për cilësitë e tij si ndihmës trajnier, me të cilin prej shumë vitesh ata edhe punojnë bashkë.
Me sa duket, Tramezzani ka menduar të nisë një etapë të re për karrierën e tij profesionale, duke nisur një aventurë i vetëm në drejtimin e një skuadre.
Sky Sport në Itali, ka folur me shumë siguri për kalimin e zëvendëstrajnierit të “kuqezive” tek Lugano, duke zënë vendin e lënë bosh nga Zdenek Zeman.
Për një lajm të tillë, nga klubi zviceran ende nuk ka një konfirmim zyrtar.
Ndërsa, mediat zvicerane bëjnë me dije se Tramezzani është në listë, por krahas tij, konkurron edhe ish-futbollisti i njohur zviceran Ciriaco Sforza.
Mirëpo, një detaj tjetër që lëkund të gjitha dyshimet e lartpërmendura nga Sky Sport, është fakti se si Tramezzani, dhe si De Biasi kanë një kontratë të firmosur me Shqipërinë.
Megjithatë, nëse Lugano i bën një ofertë zyrtare, FSHF do ta ketë shumë të vështirë për ta ndalur.
