Lorik Cana bëri të qartë që para fillimit të Europianit se sezoni i ardhshëm nuk do ta shihte me fanellën e Nantës, pasi do t’i jepte lamtumirën klubit francez. Pas aktivitetit, kapiteni i përfaqësueses la të kuptonte se gjatë pushimeve do të merrte një vendim i cili mund të kishte lidhje me karrierën e tij, duke aluduar edhe për një largim të mundshëm nga futbolli i luajtur.
Por duket se 32 vjeçari ka vendosur që të vazhdojë të luajë, edhe pse jo në nivelet më të larta dhe sipas mediave franceze, në javën e ardhshme pritet përsëri në stërvitje me klubin e Nantës.
Sipas burimeve të “butfootballclub.fr” pranë klubit francez, futbollisti ka një kontratë deri në fund të sezonit të ardhshëm dhe Nanta i ka kërkuar atij që të paraqitet pranë shokëve të ekipit, edhe pse Cana ka konfirmuar se do të largohet.
Portali konfirmon se e gjithë kjo lëvizje bëhet që Nanta të sigurojë të ardhura nga transferimi i tij drejt një klubi tjetër. Presidenti Valdemar Kita dhe Cana kanë marrëdhënie shumë të mira, ndaj mbrojtësi duket se ka rënë dakord që të fillojë stërvitjet për sezonin e ri me klubin francez, për t’u larguar drejt destinacionit të ri vetëm kur skuadra e interesuar të paguajë diçka për kartonin e tij, qoftë kjo edhe një shifër simbolike./Panorama
