“Jo panik, jo neglizhencë”. Është ky qëndrimi i ish-Ministrit të Jashtëm Ditmir Bushati në lidhje me vendimin e parlamentit holandez për të kërkuar rikthimin e vizave për Shqipërinë.
Bushati thotë se shanset që një vendim i tillë të merret për bazë nga Komisioni Europian, janë thuajse zero. Megjithatë, ndryshe nga qëndrimi i kryeministrit Edi Rama që e ka quajtur thjesht një vendim të brendshëm të Holandës, Bushati paralajmëron se nuk duhet neglizhuar.
“Shanset që një nismë e tillë të prodhojë efekte në praktikë janë thuajse zero. Ndaj nuk ka vend për panik. Shqipëria edhe pse ka shumë sfida në betejën me krimin e organizuar dhe korrupsionin i përmbush kriteret e përcaktuara sipas vlerësimeve të Komisionit Europian. Megjithatë, nuk ka vend për neglizhencë e aq më keq për stigmatizim. Përkundrazi duhet të sigurojmë integritetin e debatit publik në lidhje me këtë çështje”, shkruan ai.
Në shkrimin e tij, Ditmir Bushati analizon qëndrimet e Holandës gjatë këtyre viteve, jo vetëm ndaj Shqipërisë, por edhe ndaj shteteve të tjera dhe politikave europiane, duke sqaruar se ky vend ka mbajtur gjithmonë një pozicion konservator në lidhje me zgjerimin e BE-së.
“Por do të ishte gabim fatal që ta vizatonim Hollandën, anëtare themeluese e kontribuese kyçe në BE, mbështetëse e aspiratës europiane të Shqipërisë, si një vend racist ndaj nesh apo si një vend ku gëlon krimi e prostitucioni. Do të ishte mendjelehtësi gjithashtu të injoronim mesazhin që vjen prej kësaj nisme të Parlamentit hollandez, edhe pse e padrejtë dhe në mungesë të kritereve të përcaktuara nga vetë BE-ja”, vijon Bushati në shkrimin e tij./Opinon.al
