Kryeministri Edi Rama edhe këtë të shtunë ka ndarë me ndjekësin podkastin ‘Flasim”.
Ditën e sotme është folur në lidhje me teknologjinë dhe Inteligjencën Artificiale, ku Rama u ndal te prokurimet e fondeve publike.
Ai u shpreh se prokurimet e fondeve publike janë vendi nga ku buron korrupsioni, ndërsa shtoi se duke përdorur modelin e Inteligjencës Artificiale, do të ketë transparencë dhe besueshmëri.
“Prokurimet e fondeve publike janë një problem nga ku burojnë plot pasoja dhe nga ku buron pjesa më e neveritshme e qelbit të korrupsionit. Ne bëjmë mijëra prokurime në vit, janë dhjetëra mijëra anëtarë. Të gjithë këta njerëz duhet të disponojnë dijen e nevojshme ligjore dhe teknike. Një pjesë e problematikës që thonë këta o po vjedhin, vjen nga niveli jo i mjaftueshëm i kompetencave. Ata njerëz që futen janë njerëz që bëjnë punë tjetër. Futen me procedurë. Në momentin kur kjo varet nga gjithë procesi i krijimit të memories institucionale, ngritjes së kapaciteteve dhe harmozimit të ligjeve, bëhet një çështje shumë më e gjatë. Me modelin e Inteligjencës Artificiale, ne mund ta kapërcejmë komplet.
Nga njëra anë nuk keni nevojë për këtë konsum të madh energjish njerëzore për të bërë këto procese dhe neutralizojmë një masë shumë të madhe atë burim qelbi. E kthejmë prokurimin e fondeve publike totalisht transparent, të thjesht dhe të besueshëm. Gjithë ato veprime që bëjnë njerëzit, i bën algoritmi, modeli”, tha Rama.
