Ka mjaftuar një deklaratë e Deputetit Taulant Balla, ku akuzoi ish – ministrin Genc Pollo, që ky i fundit, në përpjekje për t’u mbrojtur për një leje të shtrimit të fibrës optike në rrugë, të sulmojë përseri të ndjerin Sokol Olldashi.
Pollo ka deklaruar dje se, këtë leje antiligjore dhe abuzive, e ka dhënë dikush tjetër pa lidhje fare me të.
Pollo me këtë deklaratë nuk është mjaftuar me pretendimin se nuk është ai autori i kësaj leje, por ka ritheksuar se kjo ka qenë një leje antiligjore dhe abuzive e Sokol Olldashit, pavarësisht se nga ana e tij, kur Olldashi ishte gjallë, iu drejtua Prokurorisë së Përgjithshme për hetim dhe pas hetimit, Prokuroria nuk konstatoi asnjë shkelje ligjore dhe asnjë abuzim nga ana e ish – Ministrit Sokol Olldashi.
Pollo, që e sulmoi Olldashin padrejtësisht kur ishte gjallë nuk ngurroi edhe dje ta sulmojë përsëri të ndjerin.
Ndaj këtij sulmi të Deputetit, Genc Pollo, ka reaguar menjëherë, krahas shumë të tjerëve, edhe vëllai i Sokol Olldashit, i cili ka shkruar: “Pollua, që në vetvete nuk është gjë tjetër sesa një krijesë e pavetëdijëshme dhe ofendues i rracës njerëzore, edhe këtë radhë më zhgënjeu. Jo nga pikëpamja burrërore, sepse aty nuk mund të pretendojmë, por nga varfëria intelektive e këtij frymori. Ti bëjë vetes një dhuratë që perëndia nuk ia bëri. Të tregohet njëherë të vetme dinjitoz. E nga ta dije i gjori im vëlla dhe aty ku është, se është më i zgjuar se Pollua në kuadrat. Po sikur t’i ketë inçizuar nja dy këngë këtij bilbilit, pikërisht se një ditë krimbi mund të fajësojë shiun për aspektin e tij të baltosur”, përfundon reagimin e tij, vëllai i Sokol Olldashit.
Reagime të shumta kundër këtij sulmi të Deputetit, Genc Pollo, ka patur edhe nga shumë anëtarë të Partisë Demokratike, miq dhe bashkëpunëtorë të të ndjerit Sokol Olldashi.
Tv Klan
