Teksa kanë kaluar disa ditë nga ngjarja e ndodhur në Shkozë, ku Migena Sinani u vra teksa flinte nga kunati i saj Roland Sinani, i cili më pas vrau edhe veten, vëllai i 37-vjeçares, ka rrëfyer mes lotësh si e morën vesh lajmin e kobshëm.
Në një intervistë për News 24 ai tha se babai i tij e ka marrë vesh lajmin nga mediat, teksa ka parë raportimet dhe ka kuptuar se bëhet fjalë për vajzën e tij.
Po ashtu ai ka treguar detaje rrëqethëse se si e kanë përjetuar ngjarjen dy fëmijët e mitur të Migenës.
“Po dëgjonin lajmet, dhe dikush komentonte: çfarë po bëhet këtu, pastaj babi mos mo se qenka goca ime. Më pas i ka rënë dhëndrit në telefon, por ai ishte arrestu, dhe kishte kërkuar që të hapej telefoni i tij që të njoftonte njerëzit. Askush nuk ka tentuar që ta hapë atë telefon. Policia na ka dorëzuar vajzën, me një batanije, dhe më pas më nxori rrobat. Pasi mësova lajmi, kam ardhur direkt në Shkozë.
Mbesa ka qenë shumë e lidhur dhe me mua, kur merrja motrën në tel dhe flisja ajo ishte e para që donte të më fliste, ndërsa atë ditë nuk më ka njohur dhe rrinte e trembur. Për momentin vajza nuk flet fare dha ka shqetësim natën, do të rrijë vetëm në krahë. Vajza është me ne tani. Askush nuk na ka ardhur, as psikologë, as askush tjetër. Djali 4 vjeç, vetëm kur e sheh në foto thotë kjo është mami im. Dhe në media e ka parë në televizor, thotë ‘mami im, pse ka dalë aty’”, tha ai.
