Besim Cara, vëllai i deputetit Parid Cara kompanisë së të cilit sipas një vendimi qeverie i është dhënë një hapësirë prej 80 ha tokë për ndërtimin e varrezave private në Paskuqan. ka thënë se toka në fjalë: “nuk është dhuratë për të, por një truall i vënë në dispozicion ligjërisht nga qeveria”.
“Nëse për mediat shqiptare jam fajtor që im vëlla është deputet, kjo nuk më bën fajtor mua po tregon mentalitetin e tyre. Në këtë jetë askush nuk më ka dhuruar asgjë dhe toka në fjalë nuk është dhuratë për mua, por një truall i vënë në dispozicion ligjërisht nga qeveria (jo nga Edi Rama) për të investuar për një shërbim dinjitoz që njerëzve sot në Shqipëri u mungon totalisht.
Ndërkohë që të vdekurit sot në vendin tonë varrosen njëri mbi tjetrin dhe të gjesh një varr është bërë si të gjesh flori, politika megjithë mediat nuk lënë ide biznesi dhe biznesmen të suksesshëm pa u munduar ta varrosin për së gjalli” – tha Cara në një reagim për mediat.
Më pas ai thotë se u udhëhoq nga dëshira për të bërë diçka të mirë, por pa cënuar punën e vëllait që është në politikë madje shprehet se gjithçka ai gëzon e ka falë punës së bërë në emigracion prej shumë vitesh dhe sot ai ka partner në Kanada dhe SHBA në fushën e funeraleve.
“Prandaj me keqardhje i kam lajmëruar menjëherë ortakët e mi se do të tërhiqem menjëherë bashkë me kuotat e mia dhe i kam sugjeruar të tërhiqen edhe ata. Sepse të investosh në Shqiperi duhet të përballesh jo vetëm me sfidën si investitor po edhe me stresin e tepërt psikologjik mbi gjithë familjen, përderisa kush shpif me paratë e popullit quhet politikan apo gazetar dhe kush investon paratë e veta quhet keqbërës dhe hajdut. I paftë hajrin ai popull njerëzve qe i tregojnë përralla me gogolë!” – e mbyll reagimin e tij Besim Cara, vëllai i deputetit socialist. (Shqiptarja.com)
