Kreu i Bashkisë së Tiranës, Erion Veliaj, ka takuar ditën e sotme kryeavokatin ndërkombëtar të drejtësisë sportive Efraim Barak. Lajmi është bëri i ditur nga vetë Veliaj në “Facebook”, ku shprehet se ai do të ndihmojë që të pastrojmë Futbollin Shqiptar.
Më tej, Veliaj thotë se si bashkëpronarë të FK Tiranës, Bashkia do bashkojë forcat me të gjithë aktorët që duan të pastrojnë llumin që prej 20 vitesh ka zaptuar futbollin shqiptar, duke iu referuar kështu, hetimit që ka nisur ndaj kreut të FSHF, Armando Dukës.
“Ishte kënaqësi takimi me kryeavokatin e madh ndërkombëtar të drejtësisë sportive Efraim Barak. Si arbitër i CAS dhe nënkryetar i Komitetit Ligjor në UEFA, ai do të na ndihmojë të pastrojmë Futbollin Shqiptar! Si bashkëpronarë të FK Tiranës, Bashkia do bashkojë forcat me të gjithë aktorët që duan të pastrojnë llumin që prej 20 vitesh ka zaptuar futbollin shqiptar! FORCA!”, shkruan Veliaj.
Ditën e djeshme Bashkia e Tiranës, në cilësinë e aksionerit të Klubit të Futbollit të FK Tiranës, njoftoi se do të kërkonte një hetim kombëtar dhe ndërkombëtar për kreun e FSHF, Armando Duka.
Bashkia kërkonte nisjen e hetimeve për “shkeljet dhe korrupsionin 20 vjeçar të Armando Dukës në Federatën Shqiptare të Futbollit”./Opinion.al
