Kryebashkiaku i Tiranës Erion Veliaj ftoi simpatizantët e PD dhe të LSI që t’i bashkohen Partisë Socialiste, siç tha ai, jo vetëm për kantieret e punës të hapura kudo, por dhe për vendimet e drejta të marra për vendin.
Nga Njësia 13, Veliaj theksoi se PS është forca më patriotike në vend, ndërsa u shphreh se ajo asnjëherë nuk e cilësoi UÇK-në terroriste dhe as nuk votoi raportin e Dick Martit kundër Kosovës, sikurse sipas tij bëri PD dhe LSI.
“Kjo forcë politike nuk i tha kurrë UÇK-së terroriste, siç e tha dikush tjetër. Kjo forcë politike nuk e votoi kurrë raportin e Dick Martit, siç e votuan ata të tjerët. Kjo forcë politike nuk shpifi, dhe nuk gatoi kurrë dosje për shtëpinë e verdhë, për trafik organesh, siç bëri pala tjetër. Kjo forcë politike nuk e shiti kurrë detin e Shqipërisë, përkundrazi e fitoi betejën në Gjykatë Kushtetuese.
Ky është patriotizmi sot. Kjo është të jesh patriot. Nuk po kërkon asnjë të marrim pushkët dhe të dalim malit, por mos të tradhtojmë Shqipërinë, mos ta shesim detin, të mos tradhtojmë Kosovën, të mos çojmë në Hagë ata që janë luftëtarë të lirisë. Ky është patriotizmi sot. Edhe në këtë pikë, për ju që sapo u anëtarësuat në PS, duhet të ndjeheni mirë, jeni bashkuar me familjen më patriotike të republikës së Shqipërisë”, tha Veliaj./ Opinion.al
