Kryetari i Bashkisë Erion Veliaj premtoi se në dy vitet e ardhshme të mandatit do bëjë shumë më shumë për Tiranën, por më parë duhet votuar Edi Rama për Kryeministër i ardhshëm. Sipas tij, duhet votuar bindshëm që të marrë 71 mandate, dhe më pas, sipas tij, kryeqyteti ynë do jetë më i bukuri në Ballkan.
Duke folur para banorë të njësisë bashkiake nr.7 ai tha se “duke nisur nga nesër do të bëjmë prezantimin e masterplanit të Kopshtit të ri Zoologjik nga arkitektët gjermanë. Është punuar dy vjet për këtë produkt dhe më në fund do kemi diçka cilësore për ta prezantuar. Kopshti Zoologjik dhe ai Botanik të jenë një surprizë fantastike për fëmijët e Tiranës”.
Projekti i dytë që prezantoi është rikonstruksioni i plotë i Piramidës. “Plani ynë është ta kthejmë në një qendër fantastike kulturore për të rinjtë, për ekspozita, kinema, teatër, muzikë dhe për të gjitha aktivitetet rinore e kulturore që mund të ketë, duke qenë se është në zemër të qytetit dhe totalisht e pashfrytëzuar dhe ky do të jetë projekti ynë surprizë për gjysmën e dytë të mandatit tonë”, theksoi kryetari i Bashkisë së Tiranës.
Gjithashtu, Veliaj bëri të ditur se Bashkia e Tiranës do të përfundojë edhe ndërtimin e terminalit multimodal në hyrje të Tiranës, si një portë hyrëse e kryeqytetit. “Do të fillojmë me ndërtimin e terminalit të ri për autobusët e furgonët e rretheve”, vijoi ai më tej.
Dhe për ta mbyllur ai u kërkoi votën qytetareve për PS dhe Edi Ramën. “Po votuat Edi Ramën më keni hapur aq shumë dyer për punë. Po votuat bindshëm, më fort se herën e fundit për Edi Ramën dhe po morëm mbi 71 mandate, di t’ju them që nuk ka zot që e ndal Tiranë që të bëhet qyteti më i mirë i Ballkanit, me cilësinë më të mirë të jetesës me kopshte çerdhet, me lodrat më të mira. Po votuat bindshëm Edi Ramën, po ju them që ajo që kemi bërë këto dy vjet, do ju duket asgjë me çfarë do të bëjmë dy vitet e ardhshme”, deklaroi Veliaj.
