Kreu i bashkisë së Tiranës Erion Veliaj ka folur këtë të Hënë në “Opinion” në Tv Klan dhe për raportin e tij me Kryeministrin.
Veliaj thotë se nuk ka asnjë plan që të konkurrojë Edi Ramën në të ardhmen, duke theksuar se ai është “kryeministri më i mirë i 100 viteve të fundit” në vend.
-Do të mbaroni një mandat 48 vjeç, ju nuk mund të zgjidheni më kryetar bashkie i Tiranës sepse ligji nuk ju lejon. A do të jeni ju konkurrenti kryesor dhe i parë i Edi Ramës pas mandatit?
Erion Veliaj: S’kam asnjë plan të tillë…
-S’ka njeri pa plan.
Erio Veliaj: Nuk e kam një plan të tillë!
-Kur fle gjumë nuk të trazon ndonjëherë në ëndërr?
Erion Veliaj: Unë fle gjumë aq rehat se shkoj aq i lodhur edhe kur përqafohem me atë të voglin tim, harroj gjithçka. Kështuqë ambicia ime është që të zgjohem me tim bir, ta puth në mëngjes, të shkoj në punë…
-A do e shihni Edi Ramën si konkurrent një moment?
Erion Veliaj: Asnjëherë! Me Edin praktikisht jam rrit, ne kemi një raport jashtëzakonisht special. Mund të them se jemi një dyshe perfekte, kemi një sintoni perfekte.
-Si po e qeveris Shqipërinë Rama sipas jush?
Erion Veliaj: Unë besoj që është kryeministri më i mirë në 100 vitet e fundit, që nga koha e Pavarësisë. Pa asnjë dyshim!
-Që nga Ismail Qemali? Po si?!
Erion Veliaj: Së pari është më i votuari, si në bashki, si në qeveri. Po e krahasoj me kohën kur votohej. Sot është njeriu më i votuar, është një rekord i një njeriu që qartazi shpik veten gjithmonë dhe që qartazi ka lënë një shenjë edhe kur ka drejtuar qytetin edhe shtetin.
-Pra ju thoni që Edi Rama është kryeministri më i mirë i 100 vjetëve në Shqipëri?!
Erion Veliaj: Unë e them këtë meqë më pyete, dhe në 3 të natës po të më zgjosh sepse unë jam i qartë.
