Kryetari i Bashkisë Erion Veliaj ka thënë se nesër, në Kongresin e Partisë Socialiste do të kërkojë mandatin e dytë në Tiranë, ku 100 ditë para zgjedhjeve do të prezantohen edhe 100 kandidatë për kryeqytetin. Në “News 24”, Veliaj ka thënë se nëse partitë e tjera nuk marrin pjesë, lista e PS-së do të sigurojë një përfaqësim të plotë.
“Kemi vendosur që ditën e nesërme, që është fiks 100 ditë përpara sesa të mbahen zgjedhjet, ne të kemi edhe 100 kandidatë për Tiranën, për disa arsye. Së pari, nëse marrin apo s’marrin pjesë disa nga partitë politike, ne duhet të përgatitemi sikur do ta popullonim të gjithë listën e 61 kandidatëve. Por ka dhe diçka më shumë. Lista e Tiranës gjithmonë ka prodhuar talente edhe për skenën kombëtare”, u shpreh ndër të tjera ai.
Veliaj foli edhe për situatën te zona e “Astirit”, ku tha se Unaza e Madhe do të ndërtohet, ndërsa parashikoi se socialistët do të fitojnë edhe aty.
“Partia Socialiste do të jetë fituese edhe në qendër të Astirit. Tahmaja e 40 vetave që përdoren politikisht është një bullizëm kundër qytetit. Unaza do bëhet dhe Tirana do vazhdojë do ecë përpara. Dhe unë jam i bindur që do të fitojmë edhe te Astiri”, tha Veliaj./Opinion.al
