Kreu i bashkisë së Tiranës, Erion Veliaj i ka kërkuar organizatorëve të protestës së PD, të zhvendosen nga Bulevardi për të liruar trafikun. Duke theksuar se Bashkia e Tiranës do të respektojë të drejtën e çdokujt për të protestuar, ai tha se kërkesa është miqësore.
“Jam shpresëplotë që ndoshta do kemi një mirëkuptim edhe nga bllokuesit e Bulevardit që çadra ose të zhvendoset te lulishtja e Piramidës, ose në një hapësirë tjetër, ku të mos bllokohet lëvizja e autobusëve. Kështu, mijëra qytetarë që sot nuk arritën në punë në orar, të mos kthehet në një problem kronik gjatë gjithë kësaj periudhe. Do të respektojmë të drejtën e çdokujt për të protestuar, megjithatë nëse mund të gjejmë një bashkëpunim që kjo të mos bllokojë jetën e përditshme të qytetarëve të Tiranës, që duan të jetojnë me punë, të ndjekin shkollën dhe që duan të vazhdojnë jetën normalisht, besoj se do të arrijmë një konsensus”, theksoi Veliaj.
Kreu i bashksë e bëri deklaratën gjatë inspektimit të linjës së autobusëve urbanë të ish Uzinës së Traktorëve, e cila tashmë bashkohet me atë të Institutit Bujqësor. Kësaj flote i shtohen dhe 30 autobusë të rinj.
