Në mbledhjen e sotme të Këshillit Bashkiak të Tiranës, kryetari Erion Veliaj u është përgjigjur anëtarëve të opozitës lidhur me koncertet e organizuara në ditët e para të Qershorit në Tiranë. Opozita ka artikuluar kosto për këto koncerte, ndërkohë që Veliaj ka mohuar në mënyrë kategorike që organizimi i këtyre eventeve t’i ketë kushtuar buxhetit të bashkisë.
Duke theksuar rëndësinë e ushqimit shpirtëror për njerëz më të kultivuar, Veliaj permendi se Tirana sot është shumë më e mirë se ajo e dikurshme edhe në drejtim të bukës, siç e quajti ai. Kryebashkiaku kujtoi ndër të tjera 6 mensat sociale që ofrojnë ushqim falas për shtresat në nevojë. Veliaj kërkoi ta mbyllë këtë diskutim me fjalët: Unë jap dorëheqjen nëse bashkia ka harxhuar lekë për këta artistë.
Kujtojmë se në Tiranë, vetëm pak ditë më parë mbajtën koncert artistët e njohur Rita Ora dhe Ermal Meta.
