Qytetarët e Tiranës kanë shpërthyer me reagime kritike kundër një projekt vendimi që Kryetari i Bashkisë së Tiranës Erion Veliaj i dërgon Këshillit Bashkiak, ku kërkohet miratimi i termave kryesorë të kontratës koncensionare për ndërtimin e parkingut nëntokësor te “Parku Rinia”.
Komentuesit online e cilësojnë këtë një iniciativë personale të kryebashkiakut që do ta transformojë qytetin në varrezë betoni, tanimë jo me pallate shumëkatëshe, por me parkingjë nën tokë.
Qytetarët denoncojnë dhe refuzojnë në komunitetin virtual “Mbro Qytetin”, këtë listë me 10 hapësira të tjera, të përcaktuara nga Veliaj si zona ku do të ndërtohen parkingje nëntokësore.
“Me 11 parkingjet ne qender qe parashikohen ne hapesira publike, ku shumica jane lulishte, mundesia per permbytje rritet, sepse toka e bute qe thith ujin transformohet ne siperfaqe betoni, dhe uji vozit lirshem ne siperfaqe”, shkruan nisma “Mbro qytetin”.
Nisma online në facebook “Mbro qytetin” ka paralajmëruar zhvillimin e një protestë ditën e nesërme, në orën 11, pranë “Parkut Rinia”, për të kundërshtuar atë që cilësohet një masakër me hapësirën e gjelbër./a.h
