Kandidati i PS-së për Tiranën, Erion Veliaj zhvilloi një takim me banorët e njësisë 3, me të cilët mbolli disa pemë gjatë diskutimit me to.
Gjatë fjalës së tij, Veliaj thotë se Partia Demokratike nuk ka në plan investimet e ardhshme në arsim, pasi sipas tij ata shqetësohen për faktin se Berisha është non grata.
“Kur ata dalin nëpër Shqipëri dhe kërkojnë vota, nuk kanë hallin e kalamajve tanë, se po të kishin hallet e kalamajve tanë do flisnin për shkollën e ardhshme për çerdhen e ardhshme, për kopshtin ardhshëm, për investimin e ardhshëm. Ata kanë hallin e tyre. Halli i tyre është se Saliu është non grata. Imagjinoni njeriu më i fuqishëm i Shqipërisë sot nuk shkon dot deri në Rinas. Iliri ka hall tjetër. Halli i Ilirit është se ka dalë fuksi i lagjes. Dhe shikoni çfarë thonë ata: Hallet tona u bëfshin hallet për të gjithë ju. Kurse ne themi: Jo, hallet e gjithë komunitetit u kthefshin në zgjidhje për bashkinë ndaj komunitetit. Kjo është diferenca”, tha Veliaj.
Premtimet e koalicionit të çiftit Berisha-Meta për autobusë falas e për çdo gjë falas, , Veliaj i cilëson si gënjeshtra, pasi sipas tij PD e kishte mundësinë për t’i bërë në Shkodër dhe nuk i kanë realizuar.
“Do e bëjmë transportin falas thotë Saliu me Ilirin. Autobus i lirisë, i demokracisë. T’ju bëj një pyetje. Pse nuk e bëjnë falas në Shkodër këta? E kanë Shkodrën. Një linjë ka Shkodra, Tirana ka 19 linja rreth qytetase dhe 20 në qytet, pra ka nja 39-40 linja. Ata një kanë, bën xhiro lart e poshtë nëpër Shkodër. Pse nuk e bëjnë falas atë. Nuk e bëjmë falas thonë se nuk kemi taksa. Shkodra që i ka dhënë kaq shumë Shqipërisë, sot ka 2-fishin e taksave dhe është 10 herë më keq në standard. Nuk është çështje lekësh, por është çështje menaxhimi. Ne kemi qenë të varfër, por nënat tona e menaxhonin shtëpinë me dinjitet. Këtu nuk është çështje taksash se kanë taksat 2-fish më shumë se ne, në të vetmen bashki që kanë ata. Por autobus nuk ka falas, as plehrat nuk pastrohen tre herë në ditë, as Lana dhe gjithë kanalizimet e tjera nuk janë sistemuar, as qyteti nuk po u rritet, as vlera e pronës nuk po u rritet”, përfundoi Veliaj./Opinion.al
